Festa de Sánta Maria Maiou

Festa Grana n onour de la Madona che la ven festegiada vigni ann con devozion da la jent da Fodom. Le mëde le ven a la S. Mëssa col guánt da festa, le se parëcia n bel maz o cëst de ciof da benedì nte gliejia e po’ davò mëssa peia via na sfilada fin nte plaza nuova co la Banda da Fodom, l Grop da Bal, i Scizeri e le vijinánze coi ciar abelis de ciof e sesache le mëde, i berbesc e i tosac vestis da festa da zacan. Chëst per ne recordé noste reisc, nosta cultura da bacán, la devozion , l respet e l amour de nosta jent per sua tiera, che per plu de mile agn i à dé da vive a ntiere generazion fodome.
Davò l benvegnù de rito, ven premié persone benemerite da Fodom: nstouta l é sté premié deberiada da Ulf e Comun la Luciana Palla per “sua pascion e dedizion a nrescì fora chël che à vivëst la jent da Fodom e del le autre Val Ladine ntei agn passèi, per sua competenza, braura e scrupolosité ntel scrive e fè cugnësce chilò e foravia nosta vera storia e cultura.” Per fenì via la manifestazion, s’à scinché na mëscola de len de peier per fè fora i crafons a duc chiche à tout pert a la sfilada. Davoprò on paricé gnoch da pavé e da zigher, crafons, tircle, tourte, strudel per paré la fam a la tropa jent vegnuda adalerch. Ence la lateria da Renac à porté suoi formai da podei ciarcé l meio de la produzion agricola de la val.