Ci avaralimo mei da se conté en pëc fascián e n lersc badiot deśanchei da Vaia, che s'enconta ntel piazal de na sieia, enjignei per ester siei su? Da chësta idea de David Dorich, laorada fora ntel test de Vigilio Iori l é sté metù auna el toch de teater dal titol »l'Elber conta – Le lëgn cunta«
, che a fat tapa nta Fodom domënia 4 de otober ntel self dei congresc grazi e a l'Union dei Ladins e l Comun da Fodom. Na dománda che a fat vignì curiousc plù de un che a sfidé el temp e le restrizion del Covid per tò pert en bon numer, con sodisfazion dei organizadous e dei artisć. La tempesta Vaia l'a toché dassën el teritorio da Fodom. I sens i vedón encora ciari dintourn ai paisc, nte chi bosć ulache le plánte i é encora ilò rebaltade e a luosc le restarà ilò fin che le s'enmarcirà perciéche costa massa ji a le tò su. Envalgugn de chisc elbri vegli veglons, che a vedù e vivëst la storia de Fodom de sti ultimi 130 agn. Proprio come chël lersc badiot e chël pëc fascián che ntel teater i fesc amicizia davánt de jì adincontra a suo destin de taia o bora: chël de ester siei su e deventé ceze de auter nte le mán de chelche maringon o arteján (demé a la fin del teater se l vignarà a savei) vedarà suo destin). Ma entánt i a dut el temp, ence se a trac el susciuro de na motosieia ie fesc vignì »la scorza de pita«, de se la conté. El pëc per fascián e l lersc per badiot i scomencia a recordé chëla not de Vaia che i rebaltei davò agn e agn che gnánca le gran nevere o aluvion eva stade bone de fè. El ricordo de Vaia che resta encin davòvia per fè lerch a na longia riflesción dei doi elbri sui fac e le vizende che a segné la storia de le val ladine da nen scecol encà: dai prums sciori che vigniva nte le Dolomiti, po' la Pruma Viera, da al fascism e l nazism fin a le opzion e l avént del turismo de massa. Fac recordei e contei a oute con ironia, a oute con note de tristëzza, ma tres co l pensier lesier de envié a fè na riflesción da ulache vignón e ulache volón, o i vòl, ne fè jì. Dassën bravi e n Diovelpaie per chëst a l'asociazion »I Bontemponi« e Simon Kostner, la regista Ilaria Chiocchetti, i atori Letizia Pezzei, Manuela Rasom, David Dorich, Ivano Favé e Ismael Pellegrini. A propojito, ma ci fin ali fat chi doi elbri? Demé chi che l eva a teater i lo sa.
