La lejenda: I Salváns
La lejenda l'à tol ite n gran pert la cultura ladina. La jent che vivëva nlouta nte le val ladine l eva i Salváns, parons dei bosć, e le Anguanes, ële mitiche che stëva ulache l eva liec e fontanele de iega. Drio a chël che conta la lejenda, chëste figure, gaierte de la liberté che i ava e restier a se arvejené a la jent che scomenciáva a se fè su cesa nte chëste val, mefo velch outa i se lasciáva ntëne e i damanáva de sté a sue condizion. Se conta che nt'Andrac, paisc da Fodom, n bacan s'ava nconté co na jovena mei cugnisciuda davántvia, l'eva fia de Salváns, e l se nnamora de sta bela tosa; dëla la nconsent del maridé ma a pato che dël l no damane mei a dëla o a de autri chël che l eva l suo inom. Dëla s'ava lascé batié e spo i doi nuic i à vivëst a la longia n armonia, finché l om, curious de savei ci inom che l'ava sua fëmena, l é vegnù al savei. Ntel sentì clamé il suo inom, dëla l'à mossù arbandoné la fameia e tourné su le mont n braglan; demè co l eva la sëra de la sabeda la tournáva a pone ju i suoi fioi, ma zenza di parola al om, fintánto che l'é sparida del dut.Elemenc de architetura: La stua e la cesadafuoch
Chësta l'eva una de le tánte lejende che i contáva ai tosac nte stua, cánche chi de fameia i ava chël cin de temp da sté fora dal laour. La stua l'é na ciauna che l'eva nte vigni cesa ladina, l self plu douré e plu comedo de duta la cesa: chilò se marenëva, se paussáva, le ële fajëva da filé, luoch de festa e de doi ciacole co la jent che vegniva a saludé. L eva ence ulache se periáva e se dijëva l rosare per i morc. I ladins da Fodom e de le autre val de le Dolomiti, compagn a chi che vivëva su per le mont del Sudtirol, i à da tres spartì fora chëla che l'eva la cesadafuoch, ulache se cujináva, e la stua sciaudada ite dal fornel de mur.La cesadafuoch l'eva n self dut fat de mur, neigher dal folum ajache l fuoch l eva a vista, con souravia na fana tacada nte na moronela che vegniva dal celour ju. Valgune banchëte da sté sentei prò l fuoch a cujiné, fane e massarie tacade su per i parei, le condle de ram luster da la iega, su na corona i piac e i cazuoi fac de len dourei per mangé.
La poura dal fuoch l eva grana nlouta, percieche se l tacáva l ruáva nten atimo a ciapé duta la cesa, fata per la maiou pert de len, e l pericol l ruáva nfin a le cese damprò e al paisc ntier. Grana l eva difati la devozion per San Florián, desmostrada da na tradizion de icone che l tol ju ntánt che l curisc le flame co la iega.
Per chëst, ma ence per no avei fum o tof per cesa, la cesadafuoch no n ava gnánca n usc deberiada co la stua, sciaudada nveze dan fornel saré ite, fat de mur, de forma torona con dintournvia n bánch de len e de soura n let de breie per se poné ju al ciaut.
La stua, che col temp la deventa tres de plu la ciauna per i momenc da sté auna a la fameia o a la jent del paisc,la se abelisc e la deventa tres plu de valuda, nflorada de len e de bec. Damprò al fornel na taola e n bánch, l canton col Crist e le soeje dei Sánc, na ora da mur e velch foto de berbisc e mëde de temp ncornijade de breia laora fora, n seglel per se segné ite pruma de jì fora da porta.
Damprò a la stua, n usc l porta nte stangort , na picola ciauna ulache dormiva chi plu de temp e le ële coi tosac; nflorada de len e sciaudada dal fornel ajache n parei l eva deberiada.
Mefo verscio la fin del Votcënt rua l fegolé nte le cesedafuoch da Fodom, n pas verscio la modernizazion e che va a mudé l vive nte le cese de la jent da mont.
Vestiario: L mesalana e l guánt da fodoma
Coscita la viaggiatrice Amelia Edwards, a passé per Fodom, scrivëva ju ntel suo diario del guánt vestì da le ële del luoch, l mesalana: "I ciapiei i é compagn de chi dei ëi e decorei coi medemi ornamenc. Le gonele i é de desferenc colour dal vërt scur al blef o neigher e i toma ju n strente faude, someia chële dei kilts, le scomencia bele da sot le spale nju, nsomeia n elegánte sach; i corpeti, giouris davántsu, i é ornei de stofa rossa. Chëst guánt l deventa ncora plu carateristego da la forma de le manie de la ciamëja, de tëla bláncia strente a la conogla ma che le se gioura a sbuf su per l brac; l dut laoré ju con fazolëc colour ros ciaro o sel, de coton desegné, liei ntourn al col".Chëst vegle guánt de le ële da Fodom l é sté douré nfin a la pruma viera mondial, gauja l suo ester pesoch e scomedo l é sté arbandoné e sostituì col guánt da fodoma, ncora ades vestì ntei dis de la tradizion.
A desferenzié l guánt da feste con chël douré i dis da laour l eva le stofe e i colour del guánt, ma souradut i ornamenc e ci che jiva pro. Da feste vegnivà douré na colana de corei (corei dal bon), che somiëva che la cialëssa soura l col da vigni mel, l eva ciolada auna da na clup de arjent ulache vegniva ju na medaia de or o d'arjent; se portëva ence laprò na longia moronela, tres de arjent, outada plu viadesc ntourn al col e ulache vegniva taché na cëra co na picola requia o la memoria de na persona manciada. I ciaveis i vegniva tachei su con trëce, che no girava dut ntourn la testa ma i eva tacade jape la testa, fisciade con spilons de arjent, co la testa torona (gujele) o plata (curarece).
Chisc ornamenc i eva i medemi per l mesalana e l guánt da fodoma. Compagna l é ence la ciamëja bláncia con de biei bec, l fazolët de tánc de colour, le ciauze dai stoi (de lana de cesa laorade a maia grossa coi stoi blánc e neigri), la gonela sot rossa. Chël che se muda del dut dal mesalana al guánt da fodoma l é la gonela, no plu plena de faude davosù ma nfizada al bust sot la schëna e no plu puoch sot le spale. L corp de la ëla col guánt da fodoma l ciapa na forma, a desferenza de la gonela del mesalana che la curiva via dut.
L guánt da fodoma l ava na bela gonela neigra, co na auzëta e n bel our fat su, l bust da d'inviern co le manie ornade de velù, chël da d'isté zenza manie e co la ciamëja bláncia plena de bec e ricami, i gurmiei de sëda e de satin colorei e lustri, o fac de lana neigra coi ciof. Le vëte del gurmel fate de sëda ciolade davántvia, a mán dërta se le ële i eva maridade, a mán ciámpa per chële autre: chëst, auna col colour del cordin che sarava ite l davántsu de la ciamëja che l eva ros per le ële no maridade e vërt per le maridade, l eva un dei puoc sens che fajëva ntëne l status de la ëla.
L fazolët fat de lana a ciof l vegniva fat su a mez, mpoié su le spale e ciolé davántsu con n pontapeto.
Davò la viera l ciapel se muda: ven metù su na pluma de struz coche l eva la moda ampezana, co na vëta neigra de sëda che gira dut ntourn e che ven dopla ju per la schëna: la pluma, plu picola de chëla che i ava su i ciapiei de Ampëz coscita che la se adate meio al guánt scemple che l eva chël da fodom, somiáva che la vegniva touta via cánche la ëla se maridëva.
