Nosta sezion

L'Union dei Ladins da Fodom l'é stada metuda su a La Plié ntel 1968, ruada davoprò e col sosten dei movimenc ladins vegnus fora bele ntel Nuofcënt e deventei gaierc e plu sentus da la jent davò la viera; la ULF la fesc pert de la Union Generela di Ladins dles Dolomites.

L'Union Ladins da Fodom, coche disc l statut, la vol "slargé fora e stravardé l patrimone del descore ladin e del folklor", per tegnì auna l liam coi autri ladins del Sela e per daidé pro l'economia de la val, fata de agricoltura, artejanat e turism.

Trope i é stade le scomenciadive nte la longia ativité de l'Union Ladins da Fodom.

Auna a le tánte publicazion che se pò vedei nte la bibliografia de chëst scito, toca fè memoria del Congresc de la A.I.D.L.C.M.
(Associazione Internazionale per la Difesa delle Lingue e Culture Minacciate) che l é sté fat a La Plié ntel setember del 1974, e che l à bù na valuda per dute le culture de minoránza del mondo.

L'Union Ladins Fodom ntel scomencé l'à bù ence n suo boletin, "El Feral" vegnù fora no per trop a la longia ajache no n eva i scioldi per l mané n avánt. L setimanal La Usc di Ladins l é deventé l folgio che ten auna dute le val del Sela, ulache se liec fora le nuove de vigni valada ladina.

La Ulf, ntel temp, l'à trat su i libri e i documenc che auda l mondo ladin e desferenc argomenc coscita da njigné ca na picola biblioteca che l'é dalvierta a la jent.