L'Union dei Ladins da Fodom

La storia de la Union dei Ladins da Fodom la peia via ntel Nadel del 1913, cánche don Antonio Pallua l ciapa a Innsbruck l diploma de fondadou de la sociazion Union Ladina. La sociazion l'eva nasciuda vot agn davántvia e l'eva bele cugnisciuda nte dute le fameie de la Ladinia, mascima per i Calendri Ladins, i prums veri libri – documenc publichei dal 1911 n'avánt. Don Antonio Pallua l eva nasciù a Ornela, l ava fat l preve a Reba e ntel 1913 l eva sté nominé decan a Cortina d'Ampëz. Ntánt la pruma viera e ntel temp del fascism l moviment ladin l é jù n'avánt co la sua ativité zenza però podei se organisé nte na sociazion delviers.

L prum de faurè del 1965, ntel Albergo Alpino de La Plié ntánt na ascemblea giaurida a la jent ven metù su l'Union General dei Ladins – Sezion da Fodom, e Bruno Trebo, che nlouta l eva consiadou comunal e daspò capo comun da Fodom, l é sté l prum prescident. L'ULF se nveia via col gaist del nuof, tegnuda su da duta la popolazion che la dáida pro nte vigni modo.

Ntel 1967 scomencia la publicazion de El Feral che l lasciarà l posto ntel 1972 a La Usc di Ladins. Ntel 1983 La Region Veneto la recugnësc del dut i ladins e la contribuisc ence finanziariament a la straveduda e a la promozion de la cultura ladina. Da nlouta l'Union l'à publiché libri e tesć per la scola, de ntrateniment, de ciancion, su la vita de la jent e su la storia del luoch. La ULF l'à contribuì a la publicazion de trei edizion del dizionar Fodom-Talian-Todësch, l'à publiché CD sul artejanat de la val, l'à nvié via corsci de teater, la colabora co la scola e co le sociazion che promuof la cultura e l lengaz ladin: i cori, l grop da bal, la bánda da Fodom. Vigni ann, n colaborazion col comun, l'Union l'à organisa la maiou festa de la val n ocajion de Sánta Maria Maiou (15 de agost) e la contribuisc a la gestion del mujeo.

La ULF n colaborazion co le Union dei ladins de Ampëz e de Col e auna a le aministrazion comunai de chëste val i à metù su na consulta per daidé pro le colaborazion coi comuns, e i s'à prodighé per mëte su l Istitut cultural ladin "Cesa de Jan", inauguré ntel 2005 a Col. Tres deberiada co le autre val l'Union dei Ladins da Fodom l'à fat n vare storich ntel damané n referendum per podei tourné co la Region Trentin Aut Adige. La resposta de la jent, che nta Fodom l'é ruada al bel resultat del 86,4% de voti a favor, l é ben veduda ajache la fesc ntëne coche l sentiment ladin l é ncora vif e l damana de ester stravardé delviers.

Ntra i fodomi che à daidé pro a la vita de l'Union come consiadous e con oure desferente recordon:

Sergio Masarei (1943-2006). L à scrit troc libri de narativa e teater n Fodom, l à partezipé al proget Spell, l é sté per trënta agn redadou per la val da Fodom de La Usc di Ladins, autor de l'ultima edizion del Dizionar Fodom – Talián – Todësch.

Nani Pellegrini (1934). L à scrit teatri, l à fat na multivijion su Fodom, l à scrit e mujiché trope ciancion. L s'à tout su trope nciarie da prescident e da consiadou nte trope istituzion ladine. Fondadou de la Bánda da Fodom.

Luciana Palla (1950). Storica trop cugnisciuda nte la Ladinia ma ence fora. Co le sue publicazion l'à contribuì a sciarì fora trope cuestion de la viera e de la storia del luoch.

Franco Deltedesco (1920). L à metù su l mujeo da Fodom e l à publiché libri, CD e DVD su la vita da bacáns, su l'artejanat e sul vive de la jent ntel temp.