Ativité de l'ULF

La Ulf la se dà ju ntel mëte a jì trope scomenciadive per la jent: da le sëre passade n compagnia dei uji, costumi e tradizion de la "Sëra Fodoma", manifestazion organisada per agn a la longia e trop aperjiada; a la partecipazion a le feste plu sentude ntra de chëste Santa Maria Maiou ai 15 de agost, co la procescion dei guánc de le ële da Fodom e la benediscion dei ciof.

Na gaierta ativité l'é tres stada manada n'avánt nte le scole elementari, grazie ai maestri apascionei e liei al suo lengaz e a la sua cultura e che i s'à dé ju nte trope scomenciadive: teatri, lunari, mostre, ecc...

Dan viers la Ulf l'à nrescì fora la storia e l lengaz, dan auter l'à daidé pro a tegnì su le usánze de la jent, i guánc liei a la tradizion, le cese e i luosc ulache la comunité fodoma vif. Dut chëst, al lascé jì n malora, l jissa a se pierde nte la gran sgonfa che oramei l à l mondo de la globalisazion e che l é rué pián pianin ence nte nosta val.

Col aiut finanziar che l'Union dei Ladin da Fodom l'à dé s'à podù nvié via l Mujeo Etnografico de La Plié.

De gran valuda l é stada la espojizion de la mostra de foto fata a La Plié ntánt l isté del 1995 che auda le Vicende di guerra sulle Dolomiti (1914-1918). Soldati e popolazioni nella zona del fronte del Col di Lana.

N'autra bela scomenciadiva l é sté l'organisazion, fata auna a la Union Generela, de la "Taula torona" ai 17 de novembre del 2001 a Reba dal titol: Normative de defendënza de la mendrànza ladina storica del Sela. Proposte de mëte auna i debujens de le cinch valade, ulache à tout pert Giuseppe De Tomas, deputat ladin, Carlo Willeit, vizeprescident de la Provinzia de Bolzan, Roland Verra, sovrintendent provincial de la scola ladina de la provinzia de Bolzan, Marialuisa Coppola, assessor de la Regione Veneto ai deric umani e a le mendránze etniche, Domenico Morelli, prescident della Confemili.

L é sté pò metù fora e trop de nteresc l CD Rom "La grande Guerra nelle Dolomiti" cialé soura da Luciana Palla.